روايه احلى ما خلق ربي .. روايه مجنووونه ........

يــــــــوم الاربعاء..
ريما اتصلت على هنوف
ريما:الو هنو؟ شخبارك
هنوف:تمام,,,انتي شخبارك..؟
ريما:بخير
هنوف:شلون المدرسة اليوم
ريما:وااااااة روعة فاتك اليوم مدرسة الفيزياء هاوشتني
هنوف:هههه ليش؟
ريما:رحت ابيها تصحح دفتري الفيزياء وقلبت آخر ورقة بالدفتر ولقت مكتوب عليه Nawaf
هنوف:ههههههههههههههههههه ملقوفة وربي
ريما:وراحت سألتني من هو نواف؟..صديقاتي قالوا لها انه خطيبي....والمدرسة قالت:لاعاد اشوف اسمة هنا مرة ثانية واعطتني محاظرة ههههههههه
هنوف:هههههههههههههههههههههههه
ريما:هنو..نفسي بكرى اروح للسوق انا وانتي ونوف ابي لي اغراض وبعدين نتمشى ونتعشى...وماراح نطول ...ابي اروح للعليا مول او رويال بلازا..
هنوف:بس بكرى خميس و المجمعات مليانات ولا راح ناخذ راحتنا..خليها الجمعة
ريما:لا مابي انا قلت بكرى يعني بكرى هاه وش قلتي؟
هنوف:خلاص بقول لأمي وارد لك اووكي؟
ريما:يالله انا بروح اتصل على نوفه واقولها


اتصلت على نوف وافقت عليها امها ..وردت هنوف على ريما ان العمة نورة وافقت بس بشرط مايطولون..ام ريما طبعاً موافقة..

: : :

جــــــــاء من بكرى الساعة 7 المغرب

ريمالبست عبايتها واخذت شـــنطتها كانت ديور ا لونها اسود جلــــد وفيهـــا لمعة خفيفة وصغيرة..مرت على الهنوف ونوف و مهــا الصغيرونة راحت معاهم.. راحـــــوا للسوق..ماتركوا محل مادخلوة واشرتوا اكسسوارات من كليرز نعومة..

جت وحدة لريما..
.....:السـلام عليكم..!!
ريما: وعليكم السلام
...:ماعرفتيني ياريوم؟
ريما:لا والله مين انتي؟
.....:رشاء ياسخيفة امدالك تنسين صوتي امس واحنا بالمدرسة
ريما:هههههههههه هلا رشا كيفك!!
رشا:تمام انتي شخبارك؟ مين معاك؟
ريما:هذي هنوف بنت عمتي..ونوف بنت عمي
رشا:هلا وغلا بهنوف ونوف دايماً ريما تسولف لي عنكم..واتمنى اقابلكم..
هنوف:تشرفنا والله..ايه وحتى احنا دايماً ريما تتكلم عنك..قالت رشا سوت رشا
نوف:وخصوصاً مقالبك انتي وياها بالفصل ههههههههه
رشا:ههههههههه خطيرات انا وريوم ههههههههههههههههههههه
ريما:هههههههههه شفتي كيف!!..
رشا:يالله بروح لاخواتي بستار بكس لايفوتكم بنات..
ريما:احنا بنروح هناك
رشا:اوكي اشوفكم هناك باي
ريما:باي


راحت رشاء..... مها شهقت:ليما ليما طالعي هناك هذاك نواف(ريما ريما طالعي هناك هذاك نواف)
هنوف:ايوالله صادقه مهوية هذا نواف
ريما:احلفوا ياربي وش ذي الصدفة لا يشوفكم تكفون فشلة!!
نوف:مها ياويلك تروحين لنواف ..عيب لاتطالعينه..
ريما:ايه عيب نروح له وش بيقول عنا؟



هنوف :بنات شوفوا ذاك الولد الطويل مملوح بشكل..وشوفي غمازاتة جنان...
نوف:وينة وينة؟
هنوف:هذاك الي جالس يطقطق بجوالـــــــه
نوف:يا1111111111111ي يجنن يذكرني بالممثلين الهنود
ريما:وينه؟
ريما شهقت اهــــــــــــــــــــــــــئ:هذا خالي تركي يالي ماتستحون على وجيهكم
هنوف:احلفي هذا خالك ياحظك ياريما يهبل يجنن
نوف:شوفي البنات كيف يمرون من عندهـ
ريما:بنات انا ابي اروح اسلـم علية اوكي!! من زمان ..ماراح اطول..دقايق
هنوف:يالله روحي واحنا بنطالعك ياحظك بس ..
ريما:هههههههه


يوم راحت ريما لخالها تسلم عليه وقفت تضحك معاها وتسولف...واول ماراحت جـاء نواف للبنات لانه شاف مها وهو يموت على مها..
نواف:شخباركم بنات؟
البنات ارتبكوا:هاه ...........هلا نواف
مها:انا بلوح معاك نواف(نا بروح معاك نواف)
نواف:طيب...بس نوف وين ريما؟
مها: ليما مع هذا الولد( ريما مع هذا الولد)
نواف عصب لما شافها (وجلس يفكر بينه وبين نفسه..لذي الدرجة بايعتها..مافيه عند حياء ياريما..تخونيني..وتسولفين كذا مع الشباب..وين التربية..وين )... نواف ماكان يعرف تركي ابد ولا عمره شافة الا بالملكة وناسي شكلة لانه يوم الملكة كانت متوتر ولا انتبه له..ماكان يعرف ان ذاك الولد الي تتكلم معاها يكون..{ خالها}..على طول ترك يد مها ..وراح عندهم


نوف:افا11111111111 شكلة بيسوي مشكلة..مصعب يمة
هنوف:الله يستر قومي خلي نروح لهم بسرعة
نوف:يوووووووووة ياربي وش ذي البلوى

نواف ...دف ريما واعطاها كف قدام النـــــــــــــــاس...ريما طاحت ع الارض من قوة الكف..وشافتها صديقتها رشاء وانصدمت من حركة نواف..هنوف ونوف..جمدوا في مكانهم ولا عرفوا كيف يتصرفون...ماصدقوا ان البنت الي طايحة بالارض ريما!! كيف يتجراء يمد يدة على ريومة؟

الناس تجمعوا عليهم وكلهم يطالعون لريما



تركي:هيه هيه وش عندك انت..ترى ماسمح لك تمد يدك عيلها تفهم ولالا؟
نواف:لا ياشيخ..ومن انت علشان ماتسمح لي..وانتي ياريما ماتشرفيني فاهمة
تركي دف نواف اقول تراك طولتها ريما اشرف منك
نواف:وبعد تعرف اسمها
تركي:اسكت ولا كلمة ريما هي الي ماتتشرف تكون زوجة لك
نواف انصدم كيف عرف ان ريما زوجتي

ريما ماحست بنفسها الا وقامــــــــت تمشي لحالها وراحت وطلعت من بوابة المجمع محد شافها وهي تمشي بالشارع بدون وعي وتبكي وقطعت الشارع بسرعة وكانت فيه سيارة شوية والا صادمتها ..بس ريما راحت تركض.. السواق راح عندها
السواق: ريما ريما وقف وقف هنا سيارة
الشغالة:مس ريما وقف شوي
الشغالة مسكت ريما وركبتها باسيارة وريما جلست تبكـــــــــــي بحرارة..
الشغالة تسألها وش صار معاها..وهي تبكي.....وصلت للبيت وصعدت غرفتها وقفلت الباب على نفسها وطاحت على السرير وجلست تبكي (آهـ يانواف تشك فيني قبل لا تتزوجني..حسافة حبي لك..ياحسافة..جلست تتذكر كيف صديقتها رشا شافتها يوم يعطيها كف..اللحين رشا بتقول هذا نواف اللي تحبينة هذا نواف الرومانسي الحنون؟ آآآآآآآآهـ يايبة وينك تعال شوف بنتك تنهان كرامتها..ويشكك بعرضها وتربيتها...)وتبكي

في المجمـــــــــــــع/
هنوف راحت لنواف:نواف هذا تركي خال ريما
نووف تبكي:نواف انت ظلمت ريما حرام عليك..راحت تسلم علية شافته لحاله وراحت جلست عنده..
هنوف بعصبيـــــــــة:ترى ريما متعلقة بخالها حيل ..ومثل اخوها
تركي:ماقول غير الا يهديك..ويعين ريما ويصبرها عليك وعلى تفكيرك..

نواف ساكت ولاقال ولاكلمة كان مصدوم من التصرف اللي سواها ...ودهـ لو الارض تنشق وتبلعة(كيف اظلمها..كيف اشك فيها..ليش اعطيتها كف...ليش تسرعت..ليش ليش؟؟.ياربي انا دايم ظالمها..الحين وش بتسوي فيني؟ وابوي وامي وعمي .........)
تركي:وين ريما؟ وينها؟
هنوف:مدري بروح ادورها تركي راح يدورها من جهه وهنوف راحت تدورها من جهه
ونوف تتصل على جوالها ومقفل

نواف على طول طلع من المجمـــــــــــع وراح.........

تركي:طيب انتم جايين معها.؟
هنوف:ايه مع السواق..
تركي:أي بوابة؟
هنوف:5
طلع تركي يشوف السياراة بس ماكانت فيه
تركي: السيارة مو موجودة اكيد راحت ......وش العمل انتم وش تبي تسوون؟
نوف:بتصل على بيتنا يرسلون السواق وبنروح لريما على طول
تركي:انا اللحين بروح لها عن اذنكم..!!

راح تركي لبيت ريما..امها مع صديقاتها وابوها في الشركة وهي بغرفتها تصيح..صعد تركي فوق وطق الباب على ريما وريما مو راضية تفتتح الباب

تركي: ريومة افتحي الباب انا خالك تركي
ريما تصيح ماردت علية
تركي بكل قوتة على الباب:افتحي حبيبتي ريومة
ريما بصوت مبحوح:خالي والله مالي خلق تكفى خلوني براحتي..ابي ارتاح وجلست تصيح بصوت عالي


نزل تركي من الدرج وكان معصب وشاف هنوف ونوف
هنوف:تركي ريما فوق؟
تركي:ايه ورفضت تفتح لي الباب..آآآآآآآه <من قلبة..انا بروح وبحاول اتصل عليها اذا صارت رايقة مع السلامة

طلع تركي وكان معصب وحالته حاله ريما ماتستاهل هذا الانسان الشكاك ياخذها..

هنوف ونوف يطقون الباب عليها ومو راضية تفتح وتصيح وماغير تقول اتركوني لحالي..جت ام ريما وشافت نوف وهنوف...

ام ريما:نوف هنوف.؟وراكم هنا؟ وينها ريما؟
هنوف بارتباك:هاه لا بس هي جوا الغرفة
نوف:خالتي اليوم صاير موقف لريما بالسوق.
ام ريما خاف:وش صار؟ تكلموا؟

هنوف ونوف حكوا لها الموقف الي صار
ام ريما:لاحول ولاقوة الا بالله ..وهي موراضية تفتح الباب..!!
هنوف:والله حاولنا فيها..وحتى خالها تركي حاول بس مافية فايدة..
نوف:تكفين انتي حاكيها يمكن تفتح لك الباب

راحت ام ريما لغرفة ريما
ام ريما تطق الباب:ريما افتحي الباب..
ريما ساكتة وتبكي
ام ريما:انا فهمت الموضوع..افتحي الباب ماتصلح الحبسة اللي انتي حابسة روحك فيها
نوف:ريما واللي يسلمك افتحي الباب.

ريما بصراخ:اترررركووووووووووووني
هنوف:خلوها براحتها هي متضايقة..
ندى قالها تركي الموضوع وجت طايرة لبيت ريما ودخلت عليهم وكانت هنوف ونوف وام ريما بالصالة طفشانات..
ندى:السلام عليكم وين ريما؟
ام ريما:وعليكم السلام ..فوق بغرفتها اصعدي لها يمكن تفتح لك الباب..حاولنا فيها انا ونوف وهنوف ومافية فايدة
ندى:ان شاء الله..صعدت ندى لغرفة ريما وكــــــانت ريما بغرفتها (تترحم على حبها اللي ضاع..على فرحتها اللي ماكتملت..على احلامها الي تبخرت....)
ندى:ريومة حبيبتي افتحي الباب..انا ندوش
ريما كانت تبكي (حتى انتي ياندى قالوا لك عني...آهـ ياندى نفسي افتح لك الباب بس ماقدر)كان خدها متورم وفيها بقعة زرقاء من قوة الصفقة اللي جات في وجهها وعيونها صغيرة وحمراء من كثر البكي..

ندى:ريما افتحي احسن لك
ريما: وهي تبكي..ندى اذا لي عندك معزة اتركيني تكفون ريحوني ابي ارتاح وجلست تبكي
ندى عورها قلبها على ريما بعدها صغيرة وصار فيها كل هذا!!نزلت وجلست عندهم بالصالة...

ندى سرحانة بالدرج حلست تطالعة وهي تفكر(يالله مامدى لها كانت ريما تنزل من ذا الدرج مبسوطة ..والدنيا مو سايعتـــها من الوناسة..واللحين آآآهــ)

اتصلت العمة نورة على هنوف وهنوف قالت لها الموضوع..العمة نورة عصبت على نواف اتصلت على ام نواف....
..

العمة نورة:مساء الخير ام نواف..
ام نواف:هلا والله ام فيصل مساء النور
العمة نورة:شخبارك؟
ام نواف:بخير جعلك بخير
العمة نورة:وينك انتي بالبيت؟ ونواف عندك؟
ام نواف استغربت من سؤالها:ايه بالبيت..لا نواف ماشفتة من المغرب ليش وش فيك؟
العمة نورة:انا ابي اجيك اللحين عندي موضوع..
ام نواف:خوفتيني وش عندك؟
العمة نورة:اذا جيتك ابي اقولك مع السلامة


وام ريما خافت من ردة فعل زوجها لما يعرف بالموضوع ماراح يسكت وراح يفك الخطوبة..وراح يهاوش نواف..وتكبر السالفة وابو نواف يمكن يطيح عليهم..كل هالافكار تدور في بالها

ندى :بنات يالله قوموا فوق نحاول بريما يمكن تفتح الباب
هنوف ونوف:يالله..ياليت تفتح
صعدوا فوق ومافيه امل مافتحت الباب......

العمة نورة راحت لأم نواف وقالت لها الموضوع وام نواف انصدمت من ولدها وجلست تدعي عليه ..واخذت عباتها وراحت مع العمة نورة لبيت ام ريما..

ونواف لاحس ولاخبر اختفى الولد..امه تتصل عليه ومقفل جواله ...

ام ريما اتصلت على ابو ريما وقالت له الموضوع..ابو ريما عصب وتضايق ورجع بسرعة للبيت وفي عيونه غضب على نواف ...

دخل أبو ريما البيت: بدون ما يسلم:وينها ريما وينها..بنتي تنهان وأنا حي..يشك فيها هذا التافه..مو بنتي ألي تكلم عيال ..أنا بنتي متربية احسن تربية..آنا خلاص بفك خطبتها منه..مايستاهل يطول ظفر من ريما ..
العمة نورة:يابو ريما هدي بالك
ابو ريما:أي بال هذا الي بيهدى ولد مثل نواف داس على كرامة بنتي..من ذا نواف اللي تنهان بنتي قدام خلق الله علشانة..صارت فضيحتها على كل اللسان ..لابارك الله فيه
ام ريما:يابو ريما صلي على النبي..بالتفاهم تنحل الأمور
ابو ريما:اللهم صلي وسلم على سيدنا محمد..التفاهم مو مع نواف مع ابوهــ

ام نواف كانت معصبة من ولدها..والموقف الي حطها فيه..واتصلت على ابو نواف وقالت له الموضوع ..ابو نواف عصب وتضايق وراح لبيت ابو ريما..

: : :
جــــــاء ابو نواف لبيت ابو ريما ودخل عليهم بالصالة
ابو نواف:السلام عليكم
الجميع وعليكم السلام
ابو ريما:وين ولدك هذا وينه؟
ابو نواف:يابو ريما هدي نفسك..والله حتى انا طايح وجهي وانا جايك من الموقف السخيف الي حطنا فيه نواف انا وامه ..والله كلنا ندورة علشان نفهم منه وش الي خلاه يسوي كذا؟
ابو ريما:وين راح هذا؟ ابي اتصل على فيصل يمكن يكون معاه

ابو ريما:هلا فيصل شلونك؟ نواف عندك؟
فيصل:هلا خالي..والله ماشفتة اليوم توني طالع من الشركة..خير تبيني اتصل علية
ابو ريما:ايه اتصل علية وخله يجيني الحين خلاص
فيصل:ان شاء الله مع السلامة

فيصل حس ان الموضوع فيه ان ..نبرة صوت خاله مو طبيعية كان معصب..اتصل على هنوف وقالت له السالفة عصب فيصل وحس ان نواف بتصرفه هذا خسر ريما وخسر عمة فهد وخسر كثير..اتصل بنواف وكان جهازة مسكر ..راح فيصل لبيت ابو ريما...


ابو ريما وابو نواف كانوا جالسين بالمجلس..وجاهم فيصل
فيصل:السلام عليكم
الجميع:وعليكم السلام
ابو نواف:هاه بشر عساه رد ؟
فيصل:لا والله ياخالي جهازو مسكر..
ابو ريما:وين راح هذا؟ يطق بنات الناس ويختفي..بس انا اراويه اذا شفتة..
فيصل:خالي فهد ..هدي نفسك ..صحتك..
ابو ريما:أي صحة يافيصل بنتي تنطق قدام الناس وانا ساكت؟
ابو نواف:بنتك هي بنتي وحتى انا والله لو اقابلة لي تصرف ثاني معاهـ.بس هدي بالك..

خالها تركي جاء عند الرجال ودخل عليهم..وسلم عليهم..وفهمهم السالفة عدل وابو ريما كان معصب لدرجة جنونية ..وتركي وفيصل يهدون فيه..وابو نواف متضايق ومتفشل بالحيل..

الحريم والبنات مجتمعات بالمجلس الكل كان مكهرب وساكت
ام نواف:حسبي الله عليك يانواف
العمة نورة:اعوذ بالله..لاتحسبين على الولد..اللحين ماندري وينة؟
ام ريما:طيب يمكن مع فيصل؟
هنوف:لاياخالتي فيصل هنا عند الرجال..مايدري وينة
ندى:عن اذنكم بحاول بريما يمكن تفتح الباب..
ام نواف:انا بروح معاك ويارب تفتح لي الباب

راحت ام نواف وصعدت فوق لغرفة ريما وطقت الباب..
ام نواف:ريما افتحي الباب..تكفين ريحني..
ريما جلست تبكي وبينها وبين نفسها(حتى انتي ياخالتي عرفتي بالموضوع..عرفت وش سوى فيني ولدك؟عرفتي كيف اهانني؟)
ريما ساكتة
ندى:ريما افتحي والي يرحم والديك..ريما خلاص تراني تعبت..ارحمينا
ريما: تكفون خلوني براحتي مابي اقابل احد..ريحوني..خلاص تكفون وهي تبكي
ندى:خلاص يام نواف خلينا ننزل ريما ماراح تفتح الباب بنت اختي وانا اعرفها
ام نواف:الله لايوفقك يانواف كانك فشلتنا..
نزلوا ام نواف وندى وراحــــــوا للحريم..

ونواف لحد اللحين محد يدري عنه..مختفي..وجهازهــ مغلق من المغرب الى الساعة 1 باليل.. حتى فيصل وهو اعز واحد عندهـ مايعرف عنه شيء..الكل كان خايف ومتوتر..على نواف وينه فيه؟وابو ريما وش بيسوس لهم..؟وريمـــــا وش راح يكون موقفها؟

ريـــــما كانت في غرفتها تندب حظها الي رماها مع نواف..وكانت الغرفة باردة وظلام يعني مافية نور غير نور الابجورات خفيف وهادئ ..ريما قامت للمسجل وشغلت اغنية والله مايسوى لحسين الجسمي (والله مايسوى اعيش الدنيا من دونك..لا ولا تسوى حياتي بالهوجود دامك انت الي رحلت كيف باصبر على البعاد وكيف بانثر هالورود
ماحلفت انك تقاسمني المحبه..وتبقى لي ولدروبي دليــــــل..
بس حسافه الموت اقرب وارحم..حسبي الله وحده هو نعم الوكيل..)

ريما كانت تفكر بعمق وتذكرت ذا المقطع
انا مخانـــــــته تبلاني..وراني العذاب الــــــــــــــــوان
انا ماجيته هــــــــــو جـــــــاني
ورانــــــــــــي العـــــــــــــذاب الــــــــــــــــــــــــوان)

راحت وقف عند النافذة وهي تسند راسها جنب الجدار وتشوف الرجال كانوا مو طبيعين فيصل يدخل تركي يطلع حست ان فيهم شيء..!!ولا شافت نواف ابداً خافت على نواف (ياربي انا خايفة على نواف..بس هو واحد مايستاهل خوفي وحبي له)وفجــــأءة طق الباب الي قطع سراحانها..

ابو ريما:ريوم حبيبتي افتحي لي الباب..
ريما كانت محتاجةلابوها محتاجه تفضفض له محتاجه لحنـــــيتة وعطفة

ريما راحت وفتحت الباب ويوم شافت ابوها ضمها لصدره وجلست تبكي..تذكرت ايام الطفولة يوم كانت في حضنه وهي تبكي تشكي له من الهنوف الي اخذت لعبتها او من المعلمة الي هاوشتها علشان الواجب المدرسي ..ابو ريما حس بمشاعر ريما وانهم ظلموها وتسرعوا بخطبتها لنواف...

ريما:يبه شفت وش سوى فيني ..انا ريما يطقني قدام الله وخلقة..يبه يتهمني باشياء وانا اشرف منها..يبه يسب تربيتي تربية فهـد الـ0000 ..حرام عليكم يبه بعدني صغيرة على ماتحمل كل ذي البلاوي ..ودنقت راسها وبكت

ابو ريما ارتبك لما سمع كلام ريما ومايدري وش يقول معها حق بكل الي قالته..
ابو ريما:ريومه حبيبتي...انتي بنت وعاقلة وعارفة الصح من الخطاء واللحين اذا تبين تفكين خطبتك منه براحتك مافيه احد راح يضغط عليك حتى عمك وزوجته ماراح يزعلون..واذا على نواف شغله عندي بس خلينا نلاقيه وانا راح اتفاهم معاهـ ..واخليه يندم انه مد يدة على ريما الغالية..

ريما:يبه ليش هو مو تحت عندكم؟
ابو ريما:لا والله يابنيتي مابعد شفناهـ اختفاء فجاءة حتى فيصل مايدري عنه..
ريما سكتت وماعلقت..
ابو ريما:يالله انزلي لهم تحت..ترى امك ميتة من الخوف عليك..وخالتك ندى وبنات عمك كل شوي طالعين لك ويترجونك تنزلين...يالله يبه انزلي
ريما:لابس يبه وسكتت وجلست تأشر على خدها الي كان وارم ولونه بنفسجي من قوة الضربه..
ابو ريما:اووف وش ذا..الله لايوفقك يانواف كانك عورت بنيتي..
ريما ساكتة..
ابو ريما:يالله انزلي اذا انا غالي ولي خاطر عندك..تنزلين هاه وش قلتي؟
ريما:خلاص يبه شوي وانزل ان شاء الله..
ابو ريما:عشتي هذي البنت الي ترفع الراس,,هذي ريومه القوية ..الجبل الي مايهزه ريح..
ريما:اتبسمت له
ابو ريما:ياسلام عليك مشتاق لذي الابتسامة عساني مانحرم منها
راحت ريما وباست راس ابوها وطلع ابو ريما ونزل للرجال..

ريما مشغول بالها بنواف وين راح ؟وليش اختفئ؟ومعقولة فيصل مايعرف عنه اي شيء؟

راحت لبست جلابيتهــا وكان لونها عنابي وتطريز خفيف بالذهبي وفكت شعرها وعلشان تغطي خدهــا ماتحب الناس يناظرون لها نظرة الشفقة والرحمة..

نزلت ريمـــــــا من عند الدرج وقامت لها ندى وراحت وحضنتها بقوة وهنوف ونوف يركضون وراها..مو مصدقين وامها الي يوم شافتها راحت وباستها ..جلست ريما مع البنات وكأن شيء ماصار

ام نواف:ريما حبيبتي شخبارك؟
ريما:بخير..لفت ريما للبنات وطلع خدها وكانت الضربه واضحه
ام نواف:الله يصلحك يانواف ان شاء الله كانك فشلتني والله ياريما مدري وش اقول وحتى لو اقول ماعتقد انك راح تسامحين نواف ..وانا مالومك والله يلوم الي يلومك بأي قرار تتخذنه انا معاك..
ريما ماقالت ولا كلمة..

العمة نورة:طيب وينه هذا لحد اللحين ماحد يدري عنه..
ام نواف اتصلت على محمد يمكن نواف عندهـ او اتصل عليه..بس محمد الي مايدري عن نواف وطلع هو وعبد الرحمن يدورنه..فيصل راح هو وتركي يدورنه ابو نواف الي بس يقوم ويجلس مرتبك وخايفق على ولدهـ

جـــــــــت الساعه 12 ونص بالليل..ومافيه اي خبر عن نواف ..ام نواف حلست تبكي عورت قلب ريما ..وام ريما تهدي فيها..
العمة نورة:اصبروا يمكن فيصل اللحين بيرجع ومعاه خبر عن نواف
الهنوف ونوف وندى ساكتين وماقالوا ولاكلمة
ريما كانت خايفة على نواف بس ماتبي تبين لهم..

جاء فيصل وتركي
ابو نواف:هاه بشروا؟
فيصل:والله ياخالي ماتركت احد من الشباب الا وسألته عنه..وكلهم ماشافوهـ اليوم..
تركي:وانا درت على اقسام الشرطة ولا هو فيه..
ابو ريما:لاحول ولاقوة الابالله
ابو نواف: يالله وينه؟؟

فيصل:عن اذنكم انا بكرى وراي دوام بالشركة تكفون اذا صار فيه اي خبر عن نواف اتصلوا علي..
تركي:وقف فيصل خذني على طريقك..مع السلامة

ابو نواف:ياربي وين راح ولدي؟ وين اختفى؟ لي 12 ساعه ماشفته لايكون صار عليه حادث؟
ابو ريما:..تفائلوا الخير تجدوة يابن الحلال..


: : :
ام نواف تبكي: وينه وين نواف ..؟ياربي الله يستر
العمة نورة:اكيد انه نايم عند احد اصدقائه..
ام عبد الرحمن:انتي بس طولي بالك وان شاء الله مافيه الا الخير
ام نواف:اكيد ولدي صار عليه حادث ياربي بس وش اسوي؟
ريما عصبت من سمعت طاري الحادث:لا ياخالتي لاتفاولين عليه..

الشغاله جت عند الحريم
الشغاله:مس ريما جوال انت فيه دق كتير تعال شوف<مترجمة الاخت..!!
ريما تذكرت انها قبل ماتنزل للحريم فتحت جوالها بعد ماكان مقفل..راحت لغرفتها وكانت المكالمات اربع ريما خافت..وعلى طول رن جوالها وكان رقم غريب

ريما:الو؟
.. :هلا ريما كيفك؟
ريما:مين معاي؟
. . .: ريما ماعرفتي صوتي؟
ريما: بتقول من انت ولا بسكر!!
. . :نواف معاك
ريما انصدمت وجمدت في مكانها ماتدري وش تسوي
ريما:نواف وينك؟ارحم امك وابوك الي ميتين من الخوف عليك!!
نواف:ريما طمنيهم عني..واسمعي بكرى العصر راح اجيكم بالبيت خلاص؟
ريما:طيب..بس انت وينك فيه؟
نواف:ليش خايفه علي؟
ريما:لا ليش اخاف على واحد مثلك؟بس انا رحمت عمي الي طول اليوم وهو يستناك
نواف حس بالغصه من سمع كلام ريما
نواف:خلاص بكرى ان شاء الله راح اكون عندكم..وقولي لأمي لا ينشغل بالها علي انا ماراح اجي للبيت الا متأخر..فمان الله..سكر الخط..


ريما نزلت بسرعة للحريم..
ريما:خالتي خالتي نواف اتصل ويقول انه بخير..
ام نواف قامت من مكانها وراحت باست ريما..ريما استحت
ام نواف:طيب وش قال؟وينه؟متى يجي؟ليش كذا خوفنا عليه؟
ريما:ماقال شيء غير انه بكرى راح يزورنا اعصر..وقال طمني امي وابوي.. وانه بيتأخر الليله..
ام نواف: طيب والله ان شفته ماخليه الا يجيك ويبوس راسك ياريوم ويعتذر لك..
ريما سكتت ندى ونوف وهنوف يطالعون لها..


راحت ريما لعمها وطمنته على نواف وجلست معاهم شوي

ابو نواف: ريما يابنيتي انا والله مدري وش اقولك..نواف حطنا بموقف الله يصلحة ..ريما احنا شاريـــــنك وربي ونواف مدري وش الي خلاهـ يسوي هذا التصرف الهمجي..وانا واثق انه بكرى راح يجي ويفهمك ويفهمنا..واحنا كلنا نعتذر ونبيك ماتشيلين بقلبك شيء على نواف..و انتي بنتي وماسمح لاي شخص حتى لو كان ولدي يمد يدهـ عليك..

ريما سكتت ودنقت راسها ولا قالت شيء

ابو ريما:والله يابو نواف انت مالك شغل..يعني انا اذا شفت نواف بتفاهم معاهـ
ريما:عن اذنكم وطلعت..

جت الساعة 1 بالليل الكل راح لبيتهم واتفقوا انهم يجون بكرى العصر لبيت ابو ريما..علشان يشووفون وش راح يصير بين ريما ونواف

ريما كانت تفكر بنواف الي شغل بالها (ليش انا بالذات يتصل علي ..وش يبي بكرى مني..ياربي وش اسوي آآهــــ)

نواف من طلع من المجمع راح لسيارتة وجلس يدور ولا هو عارف وين يروح..؟كان يفكر بريما وانه ظلمها وعذبها..وماتستاهل انها تكون له..وراح يفكر كيف يعتذر لها..وبعدين راح لأحد المقاهي وجلس فيه الى نص الليل..طلع وراح يمشي بسيارته مايدري وش راح تكون ردة فعل ريما بكرى.؟ياترى بتسامحه.معها الحق لو ماتسامحها الي شكك في شرفها وتربيتها..وايش راح يسوي عمه فهد فيه ولاسيما نه يعرف ريما ايش هي بالنسه لعمه..

آذن الفجر دخل احد المساجد ويصلي وبعد ماصلى جلس شوي بالمسجد يقراء قرآن وبعدين طلع..حس بالراحة بعد ماطلع من المسجد وراح لبيتهم الساعه 6 الصبح..على طول صعد لغرفته وطاح ونام..


ريما مانامت الا ساعه وحدة بس.. ونزلت تحت وجلست عند التلفزيون وجت اغنية اصالة آسفه (آسفة شوفلك غيري....) ريما كانت منسجمة مع الاغنية بشكل وحست بلوعة

اول مااذن العصر جو ام نواف وابو نواف ومحمد هم ماشافوا نواف ابداً لان نواف كان نايم ومقفل باب غرفته..وبعدها جت العمة نورة وفيصل وهنوف والعم طلال وزوجته ونوف وعبد الرحمن

جلسوا الحريم بالمجلس والبنات بالصالة ..والرجال بمجبس الرجال..جت الساعة 5 ويطق الباب..ريما ارتبكت ونوف وهنوف يحاولون يهدونها علشان تتماسك وتعرف كيف تقابل نواف بدون ارتباك وخوف..


دخل نواف على الرجال بالمجلس وماكأنه نواف كان في عيونه حزن واضح وملامحه عليها التعب والارهاق..
نواف:السلام عليكم
الرجال:وعليكم السلام
ابو نواف:وينك يانواف ماشفناك خوفتنا عليك..!!
ابو ريما ماقال شيء لنواف وكان زعلان عليه..
نواف: كيفك عمي فهد.؟
ابو ريما من غير نفس:بخير
الكل كان يطالع نواف حس بتوتر شديد ..
نواف:عمي لو سمحت ممكن اتلكم مع ريما؟
ابوريما:ماشاء الله..تعطيها طراق وتبي تكلمها بعد؟
العم طلال:يابو ريما هدي بالك..الولد ماقال شيء غلط يبي يشوف ريما يبي يعتذر لها يبي يتكلم معاها وش فيك انت؟
ابو نواف:ايه يابو ريما..ضروري نواف يقابل ريما اليوم..تكفى ياخوي
ابو ريما تحت ضغط شديد:انا قايم يانواف اناديها بس مو علشانك علشان ابوك وعمك..
نواف حس باحباط



ابو ريما نادى ريما وقالها ان نواف يبي يشوفها..
ريما خافت وحست بارتباك

ريما: طيب يبه
راحت ريما مع ابوها..والعيال طلعوا برى المجلس ماكان فيه غير نواف وابوهـ وريما وابوها..
دخلت ريما وسلمت عليهم
ونواف وقف لما شافها وابتسم لها ..ريما على طول دنقت راسها..جلست ريما جنب ابوها بعيد عن نواف باآخر المجلس,,,

ابو نواف:يالله يابو ريما خلينا نتركهم ياخذون راحتهم
ابو ريما مطير عيونه:لا يابو نواف انا ماراح اترك بنتي..
ابو نواف:وين تتركها؟تراها مع زوجها اقول قم
ابو ريما معصب طلع معاهـ..

ريما ساكتة جاء نواف عندها وجلس
نواف:ريما..انا مدري كيف اعتذر لك ..انا غلطت عليك وانا ندمان اشد الندم والله اني ماسويت كذا الا من حبي لك وخوفي عليك..ريما انتي ملكتيني اسرتيني خلاص صرت ماصبر عنك..واول ماشفتك مع خالك ماحسيت بنفسي احس اني فاقد وعيي.. ماحدني اني اسوي كذا غير اني مو احبك انا اعشــــقك..ريما تكفين سامحيني.. ياريما ماحسيت بنفسي امس الا وانا متصل عليك انتي الوحيدة الي اتصلت عليك مع اني كنت متوقع انك ماراح تردين علي..ريما انا عارف اني غلطان والكلام السخيف الي انا قلته ماكنت اقصدك كذا طلع مني..حست بلوعه لما طقيتك وجرحتك..ريما (مسك يدها)تكفين سامحيني انتي قلبك كبير وطيب..تكفين<شكله يعور القلب..

ريما استحت وسحبت يدها ..ودنقت راسها,,,

نواف:الريم وش قلتي؟خلاص تراني ماستحمل تكفين تكلمي..
ريما:والله يانواف الي سويته فيني مو قليل ..بس لو مانت غالي ماسامحتك
نواف:يعني انتي راضيه عني.؟
رسما اشرت براسها يعني ايه
راح وباس راسها
نواف:ويلوموني فيك ياقلبي!!الله لايحرمني منك ومنك قلبك الطيب..انا بروح ابشرهم انك راضية عني
راح نواف لأبوهـ وعمامه وكان طاير من الفرح والعيال يضحكون عليه..دخل ابو نواف وابوها وعمها طلال عليهم هي ونواف
ابو نواف راح لريما :والله والنعم فيك يابنتي ياريما..وانا مااخترتك لنواف الا اني عارف اخلاقك وتربيتك العدله..الله يوفقكم
العم طلال:مبروك ياريما ..وانت يانواف عيونك شوي شوي عليها اكلت ريما بعيونك
ريما استحت ..والرجال جلسوا يضكون
ابو ريما راح عند ريما:الله يوفقكم ان شاء الله ..ريما وقفت وحضنته بقوة<كان منظرهم محزن..
ابو ريما:الله الله بريما يانواف حطها بعيونك..

نواف:لاتوصي ياعمي هذي الريم..
ابو نواف: يالله يبه نواف..قم انت وحرمتك وادخلوا على الحريم ترى امك بتموت على ماتشوفكم
نواف ماكذب خبر يبي يمسك ريما باي طريقة..راح ومسك يدها
ودخلوا على الحريم ام نواف يوم شافتهم بكت من الفرحة..
العمة نورة جلست تزغرد
ونوف والهنوف مبسوطات علشان ريما..
ام ريما راحت وضمت ريما..


كان العشاء في بيت ابو ريما ونواف طبعاً بس عند ريما ماجلس مع الرجال...

والرجال والحريم يتريقون عليهم..في الحديقة
نواف:تدرين اني ماراح اسميك غير الريم..
ريما:هههه ليش؟
نواف:لانك بجد انتي الريم ..وكلمة الريم تحمل الكثير من المعاني وانتي المعاني كلها تجتمع علشان توصفك..
ريما استحت..
نواف:ارفعي راسك تكفين ابي اكحل عيونك بشوفتك
ريما:خلاص نواف ترى بقوم اذا ماسكتت
نواف:لا كل شي ولاتقومين خلاص هاه سكتنا(حط يدهـ على افمه)
ريما:هههههههه عاد مو كذا
نواف:تسلم لي الضحكة وصاحبتها
ريما:نواف ماتلاحظ اننا طولنا خلاص بروح اللحين البنات انواع التريقة علي..
نواف:لا ياقلبي وين ..الحين ماني مصدق اني جالس معاك وعلى طول بتروحين وتتركيني؟وبعدين منهم البنات الي يتريقون على زوجه نواف ابن سعود؟ لاتخليني ادوس في بطونهم
ريما:هههههههههههه
رن جوال ريما طلعت نوف
نواف:الو ؟وينك يالسخيفة نسيتينا من شوفتي نوافوه
ريما:حدك مين هذا نوافوهـ؟
نواف مطير عيونه.ومبسوط على كلام ريما
نوف:بدينا ندافع انتي وجهك؟ترى غثنا هذا نواف صرنا مانشوفك علشانه
ريما:فديت قلب نواف انا..احسن خليه يغثكم شوي دايم وانتم غاثيني
نواف خلاص الولد انجـــــن على كلامها
نوف:خلاص خلاص متى راح تدخلين؟

ريما بتقهر نوف:لحظة نوف..حبيبي نواف وش رايك متى ادخل للبنات (ريما غمزت له وقربت الجوال عنده)
نواف:لا يالغلا لاتدخلين مابعد شبعت منك..
نوف عصبت:اوووووه منك انتي وياه من زينكم الشرهه علي انا الي جالسه اترجاك .. باي سكرت الخط
ريما:هههههههههههههههه..ياحياتي يانوف
نواف:وانا ماني بحياتك بعد؟
ريما بتقهره:على فكرة لاتصدق الكلام الي قلته من شوي بس حبيت اقهر نوف
نواف عصب منها :طيب طيب انا اوريك الشغل..
ريما:وش بتسوي؟
نواف: اصبري انا بروح للسيارة شوي ابي اجيب لي غرض وانتي اجلسي شوي اووكي؟
ريما:اوكي!!
نواف كان معاهـ بوكية ورد جوري<نقظة ضعف ريما..
رجع نواف ومعاه البوكية ريما قمزت من مكانها وكانت مبسوطة مرررة..
نواف:ريما بالله اعطي نوف البوكية هذا
ريما بعصبية:نعم؟نعم؟
نواف بيقهرها:ايه ياحياتي هي نووفه تستاهل ..مو من شوي تقولين انها حياتك.!!خلاص حياتك هي حياتي..اعطاها البوكيه
ريما:هههههههههههه
نواف طيب وراك ماقلتي لي يسلمو شي؟
ريما تبي تقهره:ماتستاهل..
نواف مسك وردهـ وجلس يطالع فيها وفي ريما ويقول:ياورد من علمك تجرح الجرح ماهو من طباعك؟
ريما حست انه يقصدها ورحمته:تسلمي لي يالغالي ..الله لايحرمني منك..وقطعهم صوت الجوال..

اتصل فيصل على نواف
فيصل:وينك انت وجهك؟خلاص ياخي مامليتوا من بعض؟
نواف:كيف امل وقبالي الريم!!
ريما استحت..
فيصل:ايه الريم ..اقول تعال الرجال يبونك
نواف:احلف..طيب دقايق واكون عندكم فمان الله

ريما:قلت لك خلينا ندخل تقولي شوي
نواف:ماعلي منهم دامك معاي ماهمني احد..
ريما:خلاص نواف !!
نواف :هههههه خلاص خلاص يالله بروح
ريما:يالله حتى انا
راحت ريما للحريم ونواف للرجال..
اول مادخلت ريما
ام ريما:وراك طولتي ريوم؟
هنوف:من شاف احبابه نسي اصحابه
نوف:والله حالتنا حالة جايين علشانها وبالاخير طنشتنا
ام نواف:وش فيكم عليها..خلوها براحتها
ريما:هههههههههه
جلست ريما مع الحريم ..

: : :
عند الرجال دخل نواف
نواف:السلام عليكم
الجميع:وعليكم السلام
فيصل:كان ماجيت
نواف:والله ودي هههههههه
محمد:ايه اخوي وانا اعرفه ترى ماكان يبي يدخل
نواف:والله انك صادق
العم طلال يمزح مع نواف: ياخي استحي على وجهك يانواف وش ذا الكلام
فيصل:هههههههههههههههههههه
محمد:ههههههههههههههههههههه
عبد الرحمن:ههههههههههههههههه
نواف: وش فيكم؟ اليوم علي!!
ابو ريما:طيب ريما دخلت..
نواف:ايه


جت الساعة 12 وبعدين الكل راح لبيتـــــــــــــــه..

العم ابو نواف كان مسوي عزيمة كبيرة بمناسبة رجوع نواف لريما في المخيـــــم الي بالبــــر الكل راح العصــر الساعة 5 (وبما ان الاخوان مرة مرتبطين ببعضهم ابو ريما وابونواف وابو عبد الرحمن فالكل يطلع )


ريما لبست تنورة رصاصي برمودا وعلى الخصر ربطه حرير لونها فسفوري اخضر فاتح مرة كلها ترتر والبلوزة كانت لونها فسفوري وفيهـــــا بالوسط طبعة وردهـ كبيرة مخمل لونها رصاصي وفيها ترتر خفيف ..لبست ربطة شعر كانت لونين فسفوري ورصاصي مموج بعضها بعض وكانت مجعدهـ شعرها صايرهـ ستايـــــــل!!


جلست مع الحريم الي كانوا في قسم الحريم والرجال طبعاً في قسم الرجال الكل كان حاضر وموجود.. ريما وهنوف ونوف كانوا جالسن يشبرون عصايرهم ويسولفون
نوف:هنوف تكفسن قولي لفيصل نبي نتمشى الجو روعة!!
هنوف:هاهاهاهاها قال فيصل قال اقول فكينا منه..انا طالعه ابي اشم اوكسجين تذكرني بفصيل هذا
ريما:ليش؟قولي له مها وعبودي نفسهم يطلعون يتمشون اكيد بيوافق!!
هنوف:ماراح يوافق اخوي نذل ههههههههههه
ريما:ههههههه جربي ماراح تخسرين شي
نوف:ايه تكفين يالله عا111111111د
هنوف تتغلى عليهم:بس انا جوالي مافيه رصيد بــــــــح!!
نوف:فدوهـ لك جوالي وصاحبته بس انتي اتصلي...
ريما:يالله عاد هنو مافيه اعذار ..امس امطرت واكيد المناظر برى جنان!!
هنوف: طيب طيب!!ياربي الله يستر منك يافيصل<<مسوي رعب

هنوف:الووو فصولي؟
فيصل عند الرجال:هلا
هنوف: ممكن اطلب طلب..موبس انا كل الحضور<تتخيل انها مع اغنيه راشد
فيصل:وش تبين؟
هنوف:انا والبنات وطبعاً الغالين مها وعبودي نفسنا نتمشى الجو روعة هاه وش قلت؟
فيصل:الا على فكرة الحين كلنا بنطلع نتمشى الرجال والحريم من شوي خالي ابو عبد الرحمن قال اننا بنطلع نتمشى مع الحريم والبنات الجو حلو والمناظر روعه
هنوف:احللللللللللللللللللف..ياحياتي ياخالي اذا شفته ابغى ابوسه على راسه..
فيصل:هههههههههههههههه يالله قولي للحريم يتجهزون
هنوف:طيب كم السيارات الي بيروحون؟
فيصل:انتي وش عليك؟الحين مالك الاتروحين وتتمشين
هنوف:طيب طيب لاتهاوشني..دايم ماتكملها هالمعاملة الزينة الا تختمها بهوشة
فيصل:سلام سكر الخط

هنوف قالت للبنات وللحريم الكل لبس عباته ومها وعبودي حالتهم حاله مبسوطين يحبون السيارة مرة ..

طلعوا الحريم من المخيم..والرجال كان برى..طبعاً ابو نواف جلس ومحمد وعبدالرحمن جلسوا معاه ماحو يتركونه لحاله لان الجميع راح وخلاهـ

سيارة ابو ريما كانت فيه العمة نورة وام ريما وام نواف وام عبدالرحمن (السيارة صغيرة لكزس)
سيارة فيصل كانت فيه هنوف ونوف ومها وعبودي (بعد سيارته صغيرة مكسيما)
سيارة نواف مافيها احد..

ريما جت متأخرة لقت الكل راكب السيارات راحت اتصلت على هنوف وقالتها لها انها بسيارة فيصل مع نوف والبزارين فتحت الباب لقت ماتكفي السيارة عصبت وسكرت الباب

راحت لسياراة ابوها كانت ملسانة ولافيه مكان وقفت مكانها وهي معصبة..!!
فجأءة سمعت صوت يناديها ريمــــــــا ريمــــــــــــا!!
التفت لاقته نواف..
اتصل عليها
نواف:هلا وغلا بالريم..
ريما بصوت متقطع من الحيا:هلا
نواف:وراك ماتركبين؟
ريما سكتت ماتدري وش تقوله:مدري مليانات
نواف:افا ياريما اللحين سيارتي فاضية مافيها احد وزوجتي واقفة تبي تركب ولا تلاقي احد؟
ريما متفشله
نواف:الوووو ريما؟ معاي؟
ريما:اييه معاك على الخط
نواف:تعالي يالله استناك!!
ريما:لانواف والي يسلمك فشله اركب معاك
نواف:وش فشلته اقولك تعالي
ريما:لا ماراح اركب معاك..
نواف:يعني بتزعليني ؟
ريما:لا مايهون علي زعلك..بس وربي مقدر اعذرني نواف تكفى
نواف:طيب مع السلامة<<زعلان

نواف نزل من سيارتة وراح لسيارة عمة ابو ريما..وقف عند النافذة
نواف:هلا عمي
ابو ريما:هلا فيك..وراها ريما واقفه في مكانها ماتركب
نواف:عمي شوف لبنتك هذي..مالقت مكان مع البنات بسيارة فيصل وانا زوجها سيارتي فاضية اقولها اركبي معاي تقولي مابي....
العمة نورة:هذي هي ريما تستحي من ظلها
نواف: بس مو مني تستحي
العمة نورة:الا انت السبب الرئيسي في الحيا
نواف:هههههههههههههه يالله عمي تكفى قولها تركب معاي الجو بارد
ابو ريما:طيب طيب
نزل ابو ريما من سيارته وراح لريما وجلس يهاوشها وهي رافضة نواف جاء مع عمة ريما استسلمت للأمر الواقع وركبت السيارة مع نواف


ومن بعيد لبعيد انواع التريقه في سيارة فيصل البنات على ريما وهو على نواف ...ويضحكون عليهم ضحك موطبيعي...
جت ريما وفتحت الباب الي وراء قام نواف سكرة ...وفتح لها الباب الي قدام ركبت على طول لان انظـــــار الناس كلها عليها..


مشت السيارات كلها وراء سيارة ابو ريما

في سيارة فيصل انواع الهبال ضحك ومزاح مع صراخ البزارين
في سيارة ابو ريما كانت سوالف هاديـــــــــــه
في سيارة نواف (وماادراك عن سيارة نواف)هههههههههههه

نواف كان مشغل اغنية راشد الماجد متكبر علينا (يعني ماودك تجينا يعني متكبر علينا صرت متغير وقاسي...............)
نواف:الريم هاه يعني متكبرة علينا؟
ريما تضحك عليه..
نواف:فديت الضحكة انا..
ريما:نواف خلاص عاد
نواف:يالبى قلبه الي عصب
ريما:اوووووووووووووف
نواف:ههههههههههههههههههههه طيب طيب
نواف الريم..
ريما:هلا؟
نواف:احبـــك حب صعب اوصف شعوره
عن التعبير يعجز بي لساني
احبك صدق قلبي هــــــو يقولــــــه
ولاجيت اخفيه بعيوني يباني

ريما مدنقه راسها من الحيا..
نواف:الريم هذي الابيــــــــات لك يالغلا..
حس ان ريما مستحيه منهــ..
نواف:هاه ريما انتي للحين هلاليه؟
ريما لاشعورياً بكل جراءة:ايييييه هلاليه حتى النخاع
نواف:يابعدي انتي والله..ايه كذا مابي زوجتي الا تصير هلاليه
ريما:هههههههههه
نواف: وش رايك باآخر هدف سجله الذيب (للمعلوميه سامي الجابر اللاعب لقبه الذيب)
ريما:ياسلام عليه ابو عبدالله تحفة ..الله لايحرمنا من اهدافه وابداعاته..
نواف:انا صراحة مدري وش اسوي اذا اعتزل الذيب آهــ ياسامي
ريما:ههههههههه شكلك تحب سامي
نواف:بس مو اكثر منك!!
ريما استحت...
نواف:ايه اكيد احبه هذا الذيب..سامي عثرات الهلال.
ريما:الا على فكرة نواف..شفت سامي صار سفير للنوايا الحسنة عينوهـ رسمي..
نواف:والله.ياسلام عليك ياسعادة السفير يستاهل والله..اذا ماخذاها سامي مين ياخذها..
ريما:اقول وقف سيارتك شكلهم بينزلون يتمشون.
نواف:طيب يالله

نزلوا الكل كان حاب يتمشى الجو روعة بارد ومغيم الكل نزل ريما وهنوف ونوف مع بعض والحريم مع بعض..وفيصل وابو ريما
نواف بصوت عالي:ريــــــــــمـــــــــــــــا تعالي
ريما راحت له :هلا
نواف:ابي اتمشى معاك..ممكن؟
ريما تلون وجهها احمر واخضر واصفر هههههههههه
نواف:هاه وش قلتي؟
ريما: وش بيقولون عنا!! من شوي كنا مع بعض
نواف: مهما يقولون مهما صار مهما تم
انت البدايات وآخر ساحل ومينا
من هرجة الناس للعذال لاتهتــم
لو هم يحسون فيــنا ماحكوا فينا
ريما كانت تحب هذي الاغنية بالحيل ولاسيما ان نواف قايلها..مسك يدهـــــــــا ..
ريما:لا نواف تكفى نزل يدك فشلة وربي..
نواف:طيب انتي مرتي على سنة الله ورسوله كيفهم الناس
ريما عصبت ..نواف مصمم مسك يدها وابتسم لها <ريما ذابت
نواف وهو مبستم:يالله عاد..


ريما ونواف تمشو مع بعضهــــــــم ...وهنوف ونوف معصبات على نواف انه اخذ ريمــــا
هنوف:ترى هذا ولد عمك يبي له ضربه
نوف:اقسم بالله رفع ضغطي ياخي توها عنده بالسيارة..
هنوف:والله حتى احنا نبيها مو بس هو
نوف:لا شوفيها هي مايعه معاهــ وحالتها حاله
هنوف:اقول شكله مالي الا انتي وانتي مالك الا انا
نوف:ههههههههههههه يالله خلينا نتمشى لمن ربي يرزقنا بولد الحلال الي يتمشى فينا
هنوف:آهـــــــــــ ياقلبي
نوف:ههههههههههههههههههههههههههه
هنوف:هههههههههههههههههههههههههههههههه

ام نواف:ماشاء الله وربي لايقين على بعض
ام ريما:الله يوفقهم ويهينهم ويسعدهم
العمة نورة:ماشاء الله كل واحد احلى من الثاني كيف بيطلعون عيالهم؟؟!!!
ام عبد الرحمن:ايه صادقه ماشاء الله كلهم حلوين ..الله يوفقهم


ابوريما:وينه هذا نواف.؟
فيصل:ههههههههه رايح فيها الولد من شاف ريما
ابو ريما:ههههههههههههههه


نواف: ماكذب يوم قالها طلال الرشيد الله يرحمة
اموت من فرقاك واموت بلقاك
واموت في جورك واموت بحنانك
كل قضاة يموت مرة ويفــــداك
وانا اموت الفيــــن مـرة عشـــانــك
ريما:الله يرحمه..عطست ريما..
نواف:يرحمكم الله..
ريما:يهديكم الله ويصلح بالكم..الجو بارد
نواف:شكلك اخذتي برد

نواف كان لابس فنيلة لونها كحلــــي وفيها طبعات يد ياللون السماوي وبنطلون جينز ازرق وجكيت كحلي جلد..وشعرة خطير ناعم مررررررة اذا جاء هواء طيرة

نواف فصخ الجكيت ولبسه ريما
نواف:علشان ماتتعبين بسببي..يالله خلينا نرجع..
ريما كانت ذايبه مع نواف
ريما:بس شكلهم مطولين يبون يجلسون..
نواف:وش علي منهم..الريم بردت خلينا نرجع انا وانتي..
ريما:تسلم لي وهي تطالع له كان اطول منها مرررررره طويل
نواف ابتسم لها..

نواف بصوت طويل:ياجماعة انا وريما ماشيين..
ابو ريما:وين تونى!!
نواف:لابس الريم بردانه..واخاف تاخذ برد
ام نواف:ههههههههه خذ راحتك يمه..كل شي ولا ريما
ام ريما:هاه ريما وش فيك.؟تعبانة؟
ريما:هههههه لا يمة بس عطست ونواف خاف يحسبني بمرض!!
ام ريما:هههههههههههههههههه


ركبـــــــــوا نواف وريما
نواف كان بس يطالع بريما
ريما:نواف وش فيك؟لاتطالعني ..انتبه للطريق,..
نواف:كيف ماطالع وكل ذا الزين جنبي..!!
ريما دنقت راسها متفشله من كلامه
نواف:آسف آسف لاتعصبين زلة لسان..
ريما:ههههههههههه ياكثر مايزل ذا اللسان
نواف:لاتلوميــــــــــــنه..


وصلوا ريما ونواف للمخيم وكانت بس هي لحالها..بقسم الحريم نواف راح سلم على ابوهـ واستئذن منه علشان يجلس مع ريما لانها لحالها مابعد جوا الحريم..

ريما كانت تعدل الميك آب كانت ماسكه المرآيه وتحط كحــــــل ونواف جالس يطالعها من بعيد هي المسكينة مانتبهت له على اساس انه راح للرجال
وبعدين تعطرت عطر بريحة التفاح مرررة حلوة ريحتة وطبيعية..
نواف دخــل عليها وهو يقول :ليه العطر وانتي انفاسك دخون
وليه الكحل وانتي ماغيرك عيون
ريما:بسم الله الرحمن الرحيم..وش فيك رجعت.؟
نواف:ليش شايفة جني؟ خلاص شكلك مليتيني انا بروح
ريما:لا لا وقف تعال نو111111111ف
نواف رجع:نعم؟
ريما:ههههههههههههه زعلت؟
نواف: وبعد تضحكين؟
ريما:ههههههههههههههههههه فديت الزعلان.. بس كنت احسبك عند عمي والعيال
نواف:ماهنتي علي تجلسين لحالك قلت اجلس معاك..
ريما:مشكور وكلك ذوق والله

جلس نواف مع ريما وماطول بعدين جوا الحريم

راح نواف للحريم وفيصل يهاوشه ويتريق عليه ويضحك فيه ..وريما المسكينة ماسلمت من لسان نوف وهنوف..وجلسوا مع الحريم
نوف كانت فاتحة البلوتوث وكان النك حقهـــــا !i!i N !i!i
هنوف ماكانت مشغله البلوتوث
ريما # دلوعة اهلها#

عبدالرحمن:محمد ارسلي مقطع التفحيط بلوتوث
محمد:طيب افتح البلوتوث
عبد الرحمن:ياخي فاتحه من سنين طووويلة
محمد:ياحبك للمبالغه هههههههههههههه

فتح محمد القائمة ولقى فيه #دلوعه اهلها#
!i!i! N !i!i
عــــــ2006ــــبادي <عبد الرحمن

محمد:عبدالرحمن تعال شوف القائمة الي طلعت لي
عبد الرحمن:اييييه هذا حرف n نوف اختي اما دلوعه اهلها مدري والله
محمد:اكيييد ريما لانه هي بالواقع دلوعة اهلها هههههههههههه
عبد الرحمن:هههههههههههه

محمد حب يرسل لنوف وكان النك حق البلوتوث محمد ابن سعود<علشان تعرفه
ارسلها اغنيــــــــة {وينك؟} لعبدالكريم عبد القادر


نوف شهقت:اهـــــــــئ بنات بنات تعالوا شووفوا
ريما:بسم الله عليك وش فيك؟
نوف:محمد ولد عمي ارسلي
هنوف:ومن وين له رقمك ؟هاه اعترفي
ريما:ياقليلة الادب ههههههههههههه
نوف:اكلتوني انتي وياها ارسلي بلوتوث
هنوف طايرة:وشو؟
نوف:ماني بقايله لك..
هنوف:لا تكفين
نوف:ارسلي اغنية وينك حقت عبد الكريم
ريما:احلللللللللللللللفي الاغنية خطيرة يا111111111ي
هنوف:آهـ ياقلبي كلماتها تحفة ..ايه ناس يرسلها..وناس تكلم خطيبها..وناس تتفرج
ريما:ههههههههههههههههه ياحياتي انتي ..اصبري وان شاء الله بيرزقك ربي ولد الحلال
هنوف:اييه اتريقي علي..
نوف:هيه بنات وش اسوي؟
ريما:لاترسلين له..اثقلي..
هنوف:طنشي..طنش تعش تنتعش
نوف: رايكم كذا..اووكي


محمد عصب منها ومن برودها<<العم متوقع انها ترسل له

نوف:بنات ارسل مرة ثانية..وش رايكم اضغط استلام او لا؟
هنوف:يوه وش ذا اللزقه..اشطفيه حطي غير موافق
ريما:لا يابنت الحلال استلميها وطنشيه لاترسلين له
نوف استلمتها بنات...... وكـــــانت اغنية (ناويلك على نية..بس انت اصبر شويه..اذا ماعلقك فيني..وهواك يصير بيديا..ناويلك على نيــــــــة)حاط اسم نوف
هنوف:هههههههههههههه
ريما:ياويلك الولد ناويلك على نيةههههههههههه
نوف:ههههههههههههههه

طبعاً محمد استحى شاف الرجال كلهم يطالعون فيه..لانه كان بس عيونه في جواله..دخل جواله في جيب البنطلون ..نواف:محمد وش فيه جوالك؟ الي بس مبقق عيونك عليه
عبد الرحمن:نواف انت وش دخلك بالولد؟
محمد:اه ياعبد الرحمن هذا بلشة ماشفت شي بالبيت..ينشب لك في الحلق..
نواف:طيب انت وياهـ شغلكم عندي ..بس مو قدام الرجال


سهــــروا البنات وانبسطوا مع الحريم سوالف وضحك ومزح...وبعدين الكل رجع لبيته حدود الساعه 2 بالليل..

: : :

جــــاء رمضان...وريما كانت مشغولة بدراستها لان الاختبارات ع الابواب...كانت هي وندى يوم تنام عند خوالها ويوم ندى تنام عندها..ويتصلون على هيفاء بالشرقية..وعلى هنوف ونوف...
ويضحكون ويمزحون معاهم..

ريما:الوو هنوف شخبارك؟
ندى اعطيني بكلمها:هلا وغلا باحلى هنوف بالدنيا
هنوف:هههههههههههه هلا ندى شخبارك؟من زمان عنك
ندى:اقول هنوف وش رايكم بكرى تجون عند ريما وتنامون انتي ونوف عندها من زمان عنكم؟
هنوف:والله فكرة خطيرة بقول لأمي وان شاء الله توافق..ادعوا لي ههههههههههه
ندى:لا ام فيصل عسولة ماتوقع ترفض..قولي علشان ندى<عندها ثقة بنفسها
هنوف:ههههههههههههههههه
ريما وتاخذ السماعة:ماشاء الله انتي وياها تتعازمون وفي بيتي المصون هههههههههههههه
ندى باعلى صوتها وتجر السماعة من فمها:ترى هي بخيلة بس ماعليك منها انتي جايه بيت خالك فهد وانا بيت اختي سلمى ههههههههههههههه
هنوف:صادقة ندوش يابخيلة انتي الله يكون بعون نواف
ريما:آهـــــ نواف..
ندى:يووووه وشوله تقولين اسم نواف اللحين تحلم فيه ههههههههههههه
هنوف:هههههههههه الولد مسوي عمايله فيها هههههههههههههههههه
ريما:اقول اسكتي انتي وياها..
ندى:يالله هنو لاتطولين علينا ردي لنا احنا بنتظارك..
هنوف:اووكي دقايق..باي


الثنائي المرح ندى وريما اتصلوا على نوف..و مثل كذا جننوا فيها بالمكالمة ضحك وهواش..وقالوا لها..وافقت ام نوف ..وام هنوف انهم يباتون عند ريما بكرى ولاسيما ان ندووش المصرقعه معاهم..

: : :
جـــــاء من بكرى وبعد الفطور برمضان افطروا ريما وندى وام ريما..لان ابو ريما كان معزوم ع الفطور عن اخوهـ ابو عبد الرحمن ...وبعدين جلســــوا عند التلفزيون يتابعون طاش ما طاش<برنامجنا المفضل ههههههههههه

دخلت عليهم هنوف وندى قمزت من مكانها وسلمت عليها بحرارة..وجت الساعة 10 وجتهم نوف وياهم ازعجوها بالاتصالات

تعشــــوا البنات وهم يسولفون وحالتهم حالة مع ام ريما.. وبعدين جلســــوا قبال التلفزيون(تعرفون برامج ومسلسلات رمضان ماتتفوت!!)

ريما:بنات تبون آيس كريم؟
ندى:من شاور ماعطى
هنوف:اييه بليز مس ريوم بدنا آيس كريم ستروبري
نوف: وانا ابي آيس كريم فستق
ريما:وانتي ندوش؟
ندى:ابغى امممممممممممم اممممممممممم
ريما:اقول خلصي بسرعة اسلواق يستنى
ندى: اوكي ابغى بنكهة الكوفي
ريما:وانا اكيد توفي

جلســــوا يسولفون ويضحكــــون مع بعض..
ندى: ياحليلة تركي حالتة حاله مشغول بدراسته
ريما: ياحياتي الله يوفقة الطب يبي له دراسة شديدة
نوف:ماشاء الله عليه مزيون ليش مو طالع عليك ندووش؟
ندى:هههههههاي هو مزيون وانا لا اشوف انقلبت الآيه؟
هنوف ساكتة ماقالت شيء
ندى:احم احم نحن هنا وين سرحتي هنوو؟
هنوف:هاه لابس معاكم
ندى: وش كنا نقول طيب؟
هنوف: أأأأأأأأأ امممم تتكلمون عن اخوك تركي
ندى:طيب شاركينا بالموضوع
هنوف:وش دخلي انا فيه من كثر ماشوفه ولا اتكلم معاه!!
ندى: ههههههه اعصابك اعصابك
نوف:ههههههههههههههههههههه
ريما حست بهنوف انها بدت تعصب
ريما:ياربي بنات وش رايكم بجلابيات انسام الخلف الي بالمسلسل الكويتي!!
هنوف:اييه روعة وخصوصاً هذيك الممثلة مشاعل
نوف:ولا الميك آب حقها حنان دشتي
ندى:الصراحة جلابياتهم مبالغ فيها كلها حوسه والوان صارخة واشياء تلمع مادري احب النعومة

جــــــــا الايس كريم
ندى قمزت من مكانها واخذت الكيس من الخدامة
ندى:يالله طابور انتي وياها!!
ريما:ههههههه اقول اعطيني حقي
ندى:الواحد بــ15
هنوف: اقول اعطينا اللحين بدى يموع
نوف:ههههههههههههههههه

اعطتهم آيس كريم وجلســــوا ياكلون ويسولفون..

جــــت الساعة 3 الفجر!!
ريما:بنات يالله خلينا نصعد لغرفتي فوق نسولف ونضحك وراح اوريكم عندي مجلات شريتهم تحفة فيها مقابلات مع ابو الهش ياهنوووف..وانتي يانوف فيه عندي بوستر لياسر القحطاني..وندوش فيه عن توم كروز وليوناردوا و براد بيت..وشاروخان
هنوف:ههههههههه يعني تسوين عروض
ريما: ايه هههههههههه

صعدوا البنات فوق وجلسوا يسولفون ويضحكون ريما جالسه على الكنبة الي بغرفتها مدده رجوالها..وندى وهنوف على السرير ويقرون المجلات ويلعبون برجولهم مرة فوق ومرة تحت..ونوف على المكتب يضحكون وصراخهم واصل لتحت..

فجــــــــأءة رن جوال ريما وطلع نواف..
ريما قمزت من مكانها
ندى:بسم الله عليك وش فيك..بعدين مين الي متصل بالهوقت؟
ريما:بنات نواف نواف
هنوف:ههههههه انا اقول وش فيها البنت حالتها حالة..
نوف:ردي اللحين
ريما:بس اول مرة يتصل ذا الوقت..
ندى:مشتا11111ق ههههههههههههههه
هنوف:ههههههههههههههههههه
نوف:هههههههههههههه


ريما عصبت وطلعت..من الغرفة وردت عليه
ريما:الوووو؟
نواف صوته متغير:هلا الريم...شخبارك
ريما:هلا فيك..تمام..وانت كيفك؟
نواف:بخيـــــــــر,,
ريما:نواف وش فيك ..وراهـ صوتك متغير؟
نواف ماشاء الله عليها على طول عرفت ان فيني شي: ايييه ياريما..انا شوي تعبان
ريما خافت:وش فيك؟ قولي؟
نواف:لابس انا حاس اني شوي تعبان ومتحاج اسمع صوتك!!
ريما:تعبان يعني وش فيك؟
نواف:لا مو تعبان تعب.. بس تخيلي..اعز اصدقائي سافر آهـ ياريما مدري وش اسوي احس بلوعة من كنت صغير وهو معاي بالمدرسة..ويوم كبرنا سافرنا كلنا ندرس بامريكا ورجعنا سوى تخرجنا سوى واللحين راح لقى وظيفة برى المملكة سافر ............
ريما عورها قلبها عليه كان متضايق: نواف كذا حال الدنيا لكل بداية نهاية..يعني لابد تفترقون مافيه صداقة كذا تدوم لازم فيها عوائق الحين هو بيروح وانتى بتشتغل وبتلهى في شغلك.. كذا الدنيا اخــذ وعطاء..تعطيك الصديق الصدوق وتاخذهـ منك..لاتتضايق هونها وتهون
نواف:لا والي ضايقني اكثر تذكرت لحظة وداع
ليت ربي ماكتب لحظة وداع ..
ولافراق ولادموع ولاضياع..
ليت كل الناس خل مع خليله
وكل ماقــــــيل النهـــــــاية..
بين الاحبــــــــاب الرحيل..
قلــــــــت احبــــه حيــــــل..
ريما:نواف خلاص ..اللحين عندك انا بفارق صديقاتي يعني انا بثالث ثانوي وكل وحدة بتروح تخصص يعجبها.. اهم شيء يروح صديقك وهو راضي عنك..ويذكرك بالخير وتذكرة بالخير..واحمد ربك الي فيه الجوال والايميل تقدر تتواصل معاهـ..طيب تخيل زمان اول مافيه كل ذي الوسائل تنقطع عنه..طيب اذا انت تبيــــه كذا يانواف ترى احــــنا نبيك بعد..
نواف:الله لايحرمني منك ومن كلامك الي شافى جروحي..وآسف اني تعبتك معي..وازعجتك يالغلا
ريما:لا وش دعوى نواف..لاتقول ذا الكلام ترى ازعل
نواف:كل شي ولا زعل الريم..


فجـــــــأءة تدخل عليها ندى وهنوف ونوف
ندى:اوووووووووو الله ماخلصتي لحد اللحين حرام عليك الولد راح يمل منك..عيب استحي..والوقت متأخر..
هنوف:عصافير الحب مابعد خلصتوا؟
نوف:ياربي منه..حتى هنا لاحقني نواف هههههههههههههه


نواف:الووو ريما؟وش ذا الصراخ الي عندك؟
ريما:البنات نايمين عندي..
نواف:اوووف آسف شكلي ازعجبتك..روحي اجلسي معاهم
ريما:لا انا اساساً طفشت منهم بس صراخ وضحك وهواش
نواف:هههههههههههههه..قولي لهم لايضايقون الريم ولا بجي واكسر روسهم
ريما:ههههههههههههههههه. ياليت!!.خلاص نواف انا بروح لاني ماراح اكلمك بذا الجو المزعج..اووكي!!
نواف:اوكي..والف شكر يالغلا انك خففتي عني همومي
ريما:ماسويت شي..
نواف:يالله تصبحين على خير
ريما:وانت من اهله

سكرت الخط ريما والبنات انواع الضحك عليها والمزح والتريقة..صلت الفجر ونامت وتركتهم وهم يصارخون عليها ويضحكون